"Buda iz predgrađa" sada i u izdanju Nove knjige

Roman Hanifa Kurejšija „Buda iz predgrađa“, po mnogim kritičarima, predstavlja jedan od najznačajnijih proznih ostvarenja savremene britanske književnosti. Kurejši za ovaj svoj prvi roman dobio brojne književne nagrade, a roman, preveden na više od dvadeset jezika, našao se i na brojnim listama najboljih romana i književnih ostvarenja na engleskom jeziku.

Objavljeno: 14. 07. 2017 - 23:45 Promjenite veličinu teksta: A A A
Buda iz predgrada sada i u izdanju Nove knjige

Roman prati život Karima Amira koji živi sa majkom Engleskinjom i ocem Hindusom u predgrađu Londona, prolazeći kroz svoje tinejdžerske godine, uz neprekidnu potragu za avanturama i seksualnim otkrićima. Život ipak postaje zanimljiviji kada Karimov otac postane „Buda iz predgrađa“ fejk guru koji oko sebe okuplja različite „misitčne“ i „ezoterične“ ličnosti.

Kroz bogate aluzije na popularnu kulturu, pored života likova, Kurejši nam u ovom romanu otkriva i raskošnu glam i punk panoramu londonskih supkultura sedamdesetih godina dvadesetog vijeka. Čitaoci će, kao u nekoj postkolonijalnoj verziji „Lovca u raži“, pratiti Karimovo probijanje kroz uvijek uznemireni svijet adolsecencije: prvog susreta čovjeka koji je izišao iz sobe djetinjstva sa stvarnim svijetom. Taj susret nikad nije lak, a ponekad nosi i brojne traume koje Hanif Kurejši, sebi svojstvenim stilom, otkriva kao nešto istovremeno dirljivo i komično.

Iz sobe djetinjstva, Karim stupa pravo u svijet pank žurki, rok zvijezda, konzumerističke „duhovnosti“ i seksualnog oslobođenja. Paralalena ljubavna priča, inteligentna komedija, slike društvenih previranja čine „Budu iz predgrađa“ jednim od najprovokativnijih i najoriginalnijih romana savremene britanske književnosti.

Hanif Kurejši (1954) spada u red najzapaženijih savremenih britanskih pisaca. Njegova prozna djela, romani i filmski scenariji, postali su poznati po intrigantnom i majstorskom propitivanju tema kao što su postkolonijalno i imigrantsko iskustvo, seksualnost i nacionalizam. Kurejšijeva porodica potiče iz Pakistana, te njegova proza tako često predstavlja i intimno istraživanje imigrantske „izmještenosti“ i porodičnih dinamika. Međunarodnu književnu slavu stekao je upravo romanom „Buda iz predgrađa“ koji je doživio i svoju televizijsku adaptaciju, kao BBC-jeva serija za koju je muziku radio Dejvid Bouvi. Pored „Bude iz predgrađa“, Kurejši je autor i romana „Crni album“, „Intimnost“, „Gabrijelov dar“, „Tijelo“, „Posljednja riječ“.

Ovaj kultni roman savremene svjetske književnosti u izdanju Nove knjige iz Podgorice možete pronaći u svim Gradskim knjižarama ili poručiti putem sajta www.novaknjiga.com.

1407buda1

Komentari: 0

Novi komentar