Crna Gora vodila je od prvog do posljednjeg minuta, već nakon prve četvrtine prednost je bila dvocifrena (23:12), a nakon prvog poluvreman rezultat je bio 43:24. I u nastavku je naša reprezentacija dominirala u svim segmentima igre, a rekordnu prednost imala je u 36. minutu kada je Vasilije Baćović pogodio za ''plus 23'' – 65:42.
Svi igrači dobili su priliku, a trojica su imala dvocifren učinak – Petar Popović je bio najefikasniji sa 19, Vaso Milović je pored 11 poena, imao i šest skokova, dok je Milovan Drašković upisao 10. ''Crveni'' su imali sedam pogođenih trojki iz 17 pokušaja, a dominirali su u skoku jer su imali 39, naspram 29 uhvaćenih lopti koliko je imao Portugal.
Crna Gora će u trećem kolu, u subotu u 20 sati i 15 minuta, igrati sa Kosovom, koje je bilo slobodno u drugom kolu, a na startu je poraženo od Portugala.
