Naša selekcija će u Izmiru imati 3 provjere protiv selekcije Turske, sa kojom je takođe igrala prijateljske utakmice u junu, pred nastup u Svjetskoj ligi.
“Završili smo visinske pripreme i zadovoljan sam kako smo ih odradili. Svi igrači su dobro podnijeli sve napore kroz koje su prošli. Nije bilo ozbiljnijih povreda, jedino je Simo Dabović imao lakše istegnuće stopala i zbog toga zadnjih par dana trenira smanjenim intenzitetom. Sljedeća faza priprema nam započinje sa trening utakmicama koje ćemo igrati, protiv reprezentacije Turske, kao njihovi gosti u Izmiru. Otežavajuća okolnost za nas je to što ćemo te prve kontrolne mečeve igrati bez Vojina Ćaćića i Marka Bojića, jer trenutno imaju obaveze prema svojim klubovima, za koje će nastupati sljedeće sezone”, izjavio je selektor Slobodan Boškan.
Za Izmir će putovati:
Tehničari: Simo Dabović, Rajko Strugar, Nikola Radonić.
Korektori: Miloš Ćulafić, Aleksandar Minić, Luka Babić.
Primači servisa: Božidar Ćuk, Marko Vukašinović.
Srednji blokeri: Gojko Ćuk, Ivan Ječmenica, Blažo Milić.
Libero: Nikola Lakčević.
