"Crvena furija", naime, nije poražena u meču kvalifikacija za Svjetsko prvenstvo još od 1993. godine i susreta sa Danskom, predvođenom Šmajhelom i Laudrupom, koja je slavila 1:0. U tom periodu Španci su osvojili i svoju prvu titulu prvaka svijeta, kada su u finalu savladali Holanđane 2010. godine u Južnoj Africi.
Još su nastupili u kvalifikacijama za svjetska prvenstva održana u Francuskoj, Japanu i Južnoj Koreji, Njemačkoj i Brazilu, a i ovim kvalifikacijama za Rusiju za sada dominiraju.
Oni trenutno vode u grupi F, imaju 13 bodova kao i Italijani ali zbog bolje gol razlike nalaze se ispred rivala. Pored njih u ovoj grupi nalaze se i Izrael, Albanija, Makedonija i Lihtenštajn.
Njih će u narednom kolu 11. juna dočekati Makedonci u Skoplju, a najveće iskušenje da sačuvaju status neporaženih imaće u duelu sa Italijanima kod kuće 2. septembra.
