– Ja sam njemu dao da on riba, zapravo da drži štap u rukama, al kad je riba udarila on ga je meni predao, tako da sam ga ja izvukao. A teško je bilo. To mu se posrećilo, prvi put je išao na ovakvo ribanje i bilo mu je zadovoljstvo. Kazao je da ga ne bi prodao ni za što – priča Odalović kroz smjeh za Radio Jadran.
Ribu su ipak prodali, jer je, kaže, prevelika za pojesti, pa brzo propada. Prodajna cijena ovakve ribe je oko 25 eura po kilogramu, a prodaju se po ribljim restoranima. Ovaj zubatac završio je u jednom restoranu u Budvi.
Uloviti na štap ovako veliku ribu nije nimalo lako, navodi Odalović. Borba sa ovim kapitalcem trajala je oko 35 minuta.
– Udario je jaku kontru, pa je bilo teško. Mislim, to je užitak. Ko nije to doživio ili uhvatio ne može znati kakav je to užitak kad se to vadi. Kad on da kontru, pa mu malo popustiš, pa opet… i tako – objašnjava on.
Ulovili su ga na pendulu na lokaciji iza Mamule. Za mamac je koristio živu lignju, što je presudno za ovu vrstu ribolova. Mamac mora biti živ nanjeskan, kako bi ga riba vidjela, a spušta se na nekih 30 do 40 metara dubine.
– Ako si na primjer na nekih 80m dubine, pustiš 200m strune, jer mora po dnu da ide to. Ima jedno teško olovo prije mamca. Olovo ide po dnu, osjećaš ga, a mamac lebdi, odnosno radi i tako ga ribia vidi – navodi Odalović.
Kao amaterski ribolovac, do sada je ulovio preko 40 kapitalnih primejraka ribe. One do 4 kilograma zadrži za sebe i porodicu, veće prodaje. Otkriva da mu je najslađe da veliku ribu stavi u so i tako je ispeče.
