Iz svijeta filma povukla se kao 30-godišnjakinja – 1941. godine. Kolekcija njenih 36 pisama, napisanih između 1930. i 1940. godine prikazuju usamljenu i izolovanu ženu. Pisma će u prodaju 12. decembra pustiti londonska aukcijska kuća Sotbi.
U pismima, koje je Garbo pisala bliskim prijateljima u Švedskoj, opisivala je svoju depresiju i kako je život na Beverli Hilsu željela da zamijeni za švedsku prirodu.
– Posljednjih nekoliko dana ovdje su tako sivi i dosta razmišljam o Tistadu. O ljetima tamo kada pada kiša i kada nas obuzima ta čudesna melanholija – napisala je Garbo u jednom od pisama.
Glumica, koja ima švedsko porijeklo, žalila se i da je u Holivudu skoro uvijek sama i da često razgovara sama sa sobom.
– Vozim se na plažu i šetam i to je uvijek čudesno. Ali to je to – napisala je u pismu upućenom Mariji Vahtmajster, švedskoj grofici 1939. godine.
Filmska diva je pisala i kako je razočarana izmjenama napravljenim u filmu “Žena sa dva lica” u kome se posljednji put pojavila na velikom ekranu, 1941. godine.
Čuvena Greta Garbo snimila je 28 filmova i bila je poznata kao “božanstvo”, ali i kao veliki pustinjak – odbijala je da daje intervjue, autograme, da se pojavljuje na premijerama i da odgovara na pisma obožavalaca dok je živjela na Beverli Hilsu.
Nakon što se penzionisala, kao 30-godišnja žena, preselila se u Njujork i živjela sama u apartmanu na Menhetnu. Nikada se nije udavala, niti je imala djecu.
Početna cijena njenih pisama, u kojima opisuje detalje života u Holivudu, a koja su čuvali njeni prijatelji, procijenjena je na 15.000 do 20.000 funti.
