Frontmen benda “Prljavo kazalište”, Mladen Bodalec

Naše pjesme nalaze put do srca crnogorske publike, danas je sve turbo

Kultni hrvatski bend “Prljavo kazalište” je nedavno nastupao pred podgoričkom publikom. Tom prilikom, razgovarali smo sa frontmenom grupe Mladenom Bodalecom, koji nam je pričao o počecima, strasti koju on, ali i ostali članovi benda i dalje osjećaju prema muzici, uspjehu koji im se dogodio, sadašnjim generacijama muzičara, novom albumu...
Objavljeno: 06. 07. 2019 - 00:00 Promjenite veličinu teksta: A A A
Nase pjesme nalaze put do srca crnogorske publike, danas je sve turbo
Foto: City Groove festival

“Počeli smo kao ulični bend, kome se dogodio uspjeh. Ta strast i dalje postoji, na neki drugačiji način, jer su godine prošle i ostavile trag, ali uzbuđenje i radost penjanja na pozornicu ispred publike je duboku u nama i to nas vodi. Nadamo se da će to trajati još jako dugo”, navodi Bodalec.

Poznati muzičar navodi i da ne može reći da li je bolje danas ili je bilo nekada, ali da je to drugačije vrijeme.

„Svakako, tada se na drugačiji način dolazilo do pjesama, a danas je sve turbo, ako neka pjesma monotono počne, ona ne zainteresuje dovoljno slušaoca i neće je ni poslušati do kraja. Da li je teže uspjeti danas ili ranije, ja to ne znam, ali danas svako može snimiti spot“, ističe.

prljavo-k

ANALITIKA: Bend “Prljavo kazalište” je nastao 1977.godine, a vi ste se priključili par godina kasnije. Da li možete da se sjetite Vašeg prvog koncerta, kako je zapravo sve počelo?

BODALEC: Da, mogu se sjetiti. Prvi koncert je održan u mjestu Slavonski brod - Donji Andrijevici 14.12 85 godine.  Dotadašnji pjevač, Davorin Bogović je već bio etabliran. Oni su cijelu državu obilazili i imali pune dvorane i nije bilo baš lako doskočiti, jer je to bio već formiran bend koji je toliko ploča prodao, imao prijem kod publike i imao etabliranog pjevača. Čovjek mora vjerovati u sebe, nekako sam osjećao da ćemo uspjeti i jako sam volio njihove pjesme i nisam vidio razlog zašto ja to ne bih mogao. I tako je to sve krenulo.

ANALITIKA: Često dolazite u Crnu Goru, publika Vas voli, a imamo utisak i da Vi volite nastupati ovdje?

BODALEC: Imamo sreću da naše pjesme nađu put do srca crnogorske publike, i tih desetak koncerata koje smo imali u zadnjih pet godina u Crnoj Gori su bili odlični sa dobrom atmosferom i odlično smo prihvaćeni. Naš bend je poznat po tome što se maksimalno daje na koncertima, u sebi i dalje imamo energiju, koju pokreće muzika koju sviramo svih ovih godina. Sve to dijelimo sa našom publikom. Uvijek sviramo neke pjesme koje su trajno ostale i prenose se s generacije na generaciju, poput Sve je lako kada si mlad, Ne zovi mama doktora, Heroj ulice, Marina. Ljudi bi bili razočarani da ih eventualno ne čuju..

ANALITIKA: Na Vašim koncertima okupljate jako puno ljudi, različitih profila i godina. Dio publike koji voli vaše pjesme i dolazi na koncerte se još nije ni rodio ili su bili jako mali kada je bend “Prljavo kazalište” nastao. Da li postoji neka tajna uspjeha, kako stalno dobijate novu publiku?

BODALEC: Strast prema muzici je u nama i ona nas ne napušta i ne bi bilo u redu da nemamo strahopoštovanje i zahvaljujemo se zvijezdama i nebu što su nam se poklopile da nam se ostvare ambicije iz djetinjstva. Počeli smo kao ulični bend, kome se dogodio uspjeh. Ta strast i dalje postoji, na neki drugačiji način, jer su godine prošle i ostavile trag, ali uzbuđenje i radost penjanja na pozornicu ispred publike je duboku u nama i to nas vodi. Nadamo se da će to trajati još jako dugo.

prljavo-kazaliste-2

ANALITIKA: U jednoj pjesmi kažete da je “Sve lako kada si mlad”, a da li je i sada, više od 35 godine nakon što je snimljena ta pjesma, podjednako lako? Naveli ste da strast koju osjećate prema muzici i pozornici ne jenjava s godinama, pa da li bismo mogli zaključiti da je zapravo ta mladost u nama?

BODALEC: Da, može se izvesti taj zaključak. Što se tiče pjesme, ona je nastala  1983.godine, ona je doživljena i istinita. Skoro 40 godina nakon što je snimljena, na tih par stihova ne može niko ostati imun, u par riječi je rečeno jako puno toga. Vjerujemo u ono što je tamo rečeno, a u njoj se i drugi ljudi pronalaze. Kao na primjer u pjesmi “Tu noć kad si se udavala”, jer svima nam se dešavaju slične stvari.

ANALITIKA: Da li pratite svjetsku i našu savremenu muzičku scenu? Šta mislite o muzici koja se stvara danas? Kao iskusan muzičar, da li imate neki savjet mladim ljudima koji tek počinju da se bave muzikom?

BODALEC: O svim novim pravcima žanrovima mogu da pričam, jer moja djeca to slušaju. Ja pripadam generaciji, koja i dalje sluša Rolingstonse, Bon Džovija.. Oni slušaju nešto sasvim drugo, naprimjer One direction.  Čovjek ne može skroz ostati u toku, da zna gdje se šta svira uvijek, ali svako ima pravo na svoj ukus i svoje emocije i ja ne mogu bacati kamenje na to što neko sluša, ali isto tako ne može neko ni na mene jer ne slušam to. Ja sam svojoj kćerci rekao „Ma kakav One direction, pa Rolingstonsi su milion puta bolji", ali ne mogu uticati na to šta će slušati.

Što se tiče savjeta, svako ima neki svoj put... Bitni su  strast i ljubav, ali i vjerovanje u sebe, biti optimista, uporan, moraju se i zvijezde poklopiti, bitna je i sreća. U Americi ima puno uličnih svirača, koji imaju ogroman talenat, ali im se nikada nije poklopilo...

ANALITIKA: Nekada je sve bilo drugačije, satima su se čekale pjesme na radiju, kupovale ploče, te tako slušala muzika. Danas je nekako sve na klik, odmah dostupno, sve što poželimo da čujemo možemo odmah preko različitih platformi na internetu. Da li je čar izgubljena? Je li teže uspjeti danas ili tada?

BODALEC: Tačno, magija je nestala. Ne mogu da kažem onu glupu rečenicu da je nešto bilo bolje nekada, jer svi to misle za neko vrijeme u kojem su oni odrasli, međutim gramofonska ploča, pa radio, kasete, na kraju i cd koji je isto na nekakav klik, ali se mora nabaviti, pa birati koja pjesma ti se sviđa, koja ne. Ljudi su bili angažovani u vezi toga i to je nekako bilo drugačije vrijeme, da li bolje ili gore to ne mogu to reći. Svakako, tada se na drugačiji način dolazilo do pjesama, a danas je sve turbo, ako neka pjesma monotono počne, ona ne zainteresuje dovoljno slušaoca i neće je ni poslušati do kraja. Da li je teže uspjeti danas ili ranije, ja to ne znam, ali danas svako može snimiti spot, e sada šta taj spot i pregledi donose, ja to još uvijek ne znam, da li ulaznicu za koncert, nisam siguran .. Mlade generacije imaju pravo na svoj život i sve što se događa, a mi svoj put...

prljavo-k3ANALITIKA: Mnoge poznate ličnosti karijeru zasnivaju karijeru na skandalima. Kako je moguće da je Vaša karijera koja je toliko duga protekla bez mrlje, bez skandala, barem vidljivih javnosti?

BODALEC: Nije vam palo napamet da smo znali dobro prikrivati? Šalim se, nismo bili poročni ljudi, mada smo radili sve isto što i drugi muzičari, putovali, bili u hotelima, upoznali se sa onima koji su željeli uživo popričati sa nama. Skandala nije bilo, takvi smo ljudi.

ANALITIKA: Ovo su godine  Vaše velike turneje povodom 40 godina Prljavog kalazišta, a imali ste koncerte širom svijeta, u Australiji, Kanadi, Americi, Evropi... Da li stižete i da pripremate ili pak samo razmišljate o novom albumu?

BODALEC: Da, mislim da će biti sledeće godine. U pravu ste, iza nas je jako puno koncerata, njih 70 80 njih održimo za godinu dana. Zadali smo sebi zadatak da sledeće godine izdamo album. Ipak, kroz karijeru smo pomicali ljestvicu, ne smijemo pomutiti ono što je dobro i što je Prljavo kazalište tokom ovih godina stvaralo, tako da se nećemo zalijetati.

Komentari: 2

susjed

06. 07. 2019 - 07:21

Pozdrav Crnoj Gori iz Hrvatske! Sretno susjedi!
Zdravko

06. 07. 2019 - 17:09

Susjed, živio i sretan bio! Lijep pozdrav
Novi komentar