Bio je to krajnje uzbudljiv meč u kojem su izabranici Ota Ada vodili 2:0, a Korejci za svega tri minuta poravnali. Duel je riječen u 68. minutu, kada je Kudus donio tri boda svojoj selekciji, koja je tako napravila iskorak ka plasmanu u nokaut fazi.
Korejci su bolje počeli, imali su inicijativu i nekoliko šansi, ali je u 24. minutu povela Gana. Nakon centaršuta, u suparničkom se šesnaestercu najbolje snašao Salisu i doveo ‘crne zvijezde’ u vođstvo.
U narednih desetak minuta je tempo igre opao, a onda je uslijedio novi gol – opet u Kimovoj mreži. Slično kao i prethodnog puta, sve se dogodilo nakon centaršuta, a u strijelce se upisao Mohamed Kudus.
Prvu ozbiljniju prijetnju golu Gane vidjeli smo u 53. minutu – Čo je odlično šutnuo glavom, a Zigi još bolje intervenisao. Ono što nije uspio tada, Čo je uradio pet minuta kasnije. Nakon savršenog centaršuta ‘rezerviste’ Kanga, Čo je u suparničkom petercu trznuo glavom i loptu, koja je prešla preko ruke golmana Gane, poslao u mrežu.
Tek tri minuta kasnije vidjeli smo izjednačenje, iz veoma slične akcije kao i prošlog puta. U njenoj završnici, Kim je odlično centrirao sa lijeve strane, a Čo opet glavom, uz fantastičan skok, zabio loptu u mrežu.
Bio je to veliki šok za igrače Ota Ada, ali uspjeli su da se vrate. U toku je bio 68. minut, kada je Vilijams odlično centrirao sa lijeve strane, a lopta – koju je prvo promašio Mensah – stigla je do Kudusa, koji je postigao drugi današnji pogodak i donio novo vođstvo afričkoj selekciji.
Kako se bližio kraj, tako su Korejci sve žešće napadali, a malo je falilo da Čo u petom minutu nadoknade upiše het-trik. Ipak, to se danas nije dogodilo i veoma važni bodovi pripali su Gani.
Grupa “H”
Južna Koreja – Gana 2:3 (0:2)
Urugvaj – Portugal (20:00h)
Tabela:
Portugal 3 (3:2)
Gana 3 (5:5)
Urugvaj 1 (0:0)
Južna Koreja 1 (2:3)
Posljednje kolo (petak):
Portugal – Južna Koreja (16:00h)
Gana – Urugvaj (16:00h)
