Poslije inspekcije je odlučeno da postupak za dobijanje azila neće biti pokrenut za 123 migranta koji su prošle nedjelje stigli u luku Tulon na jugu Francuske, rekao je ministar unutrašnjih poslova Žerald Darmanin državnom vijeću u Parizu, navodi Figaro.
Darmanin je prije nekoliko dana izjavio da bi repatrijacija neprihvaćenih migranata trebalo da se organizuje zajedno sa zemljom u kojoj je brod registrovan, čim to bude moguće.
Odluka nove italijanske krajnje desne vlade, predvođene premijerkom Đorđom Meloni, da ne dopusti brodu „Ocean Viking“ ulazak u italijansku luku izazvala je spor s Francuskom, koja je Italiju optužila za kršenje međunarodnog prava.
Francuski konzervativni i desničarski političari kritikovali su odluku vlade da primi brod iz humanitarnih razloga.
Francuska, Njemačka i devet drugih zemalja su rekle da su spremne da prihvate izbjeglice sa spasilačkog broda s mogućnošću azila.
U četvrtak je objavljeno da je 26 od 44 maloljetnika s broda već pobjeglo iz privremenog smještaja.
Predsjedavajuća vijeća departmana je objasnila da su mladi izbjeglice, uglavnom iz Eritreje, svojevoljno napustili smještaj kako bi se pridružili svojim porodicama u Njemačkoj, Norveškoj i Švedskoj.
