Fudbal

Izvrsno finale i veliki obrt u Abidžanu: Obala Slonovače novi je prvak Afrike, Haler prekrasnim šutem riješio meč

Fudbaleri Obale Slonovače treći put u istoriji prvaci su Afrike. Oni su večeras u velikom finalu Kupa nacija, pred svojim navijačima, nakon preokreta savladali Nigeriju, rezultatom 2:1 (0:1).

Izvrsno finale i veliki obrt u Abidžanu: Obala Slonovače novi je prvak Afrike, Haler prekrasnim šutem riješio meč Foto: Getty
Portal AnalitikaIzvor

'Slonovi' su se tako po broju osvojenih naslova izjednačili sa Nigerijom, koja je posljednji put prvak Afrike bila prije 11 godina. Sa druge strane, Obala Slonovače čekala je novi naslov devet godina, a večeras je do njega došla pogocima Kesija i Halera, pri čemu je dvostruki asistent bio Adingra.

U završnici borbenog prvog poluvremena, uslijedio je šok na krcatim tribinama u Abidžanu.  Igrao se 39. minut kada su 'super orlovi' poveli - Ekong je pogodio glavom.

'Slonovi' su poravnali u 62. minutu. Adingra je izveo korner, a loptu je u suparničkom šesnaestercu glavom zahvatio Frenk Kesi i Nvabali je bio savladan.

Meč je odlučen u 81. minutu, prekrasnim pogotkom - Adingra je poslao loptu ka petercu, a tamo je snalažljivo i efektno šutnuo Sebastijen Haler - pravo u mrežu.

Podsjetimo, treće mjesto osvojila je Južna Afrika, koja je juče nakon penala bila bolja od Demokratske Republike Kongo.

Portal Analitika