U trijumfu Juventusa prvi gol u Seriji A postigao je talentovani devetnaestogodišnji engleski internacionalac Samjuel Iling-Džunior, a na kraju i Dušan Vlahović.
Inače, gosti su od samog početka susreta bili izloženi rafalnoj paljbi ekipe iz Bergama. Ređale su se prilike i šutevi pred golom Juventusa, ali nije bilo onih preciznijih.
Sa druge strane, 'stara dama' je čekala svoju šansu i ona se dogodila u 59. minutu. Nakon odbitka u šesnaestercu, Iling-Džunior bio je na pravom mjestu i poslao loptu u mrežu.
Do kraja smo gledali totalnu invaziju domaćih. No, u osmom minutu nadoknade, umjesto njihovog - vidjeli smo novi gol gostiju. Nakon brze kontre, strijelac je bio Vlahović, koji je sjajno šutnuo sa 16 metara.
Juventus je na korak od plasmana u Ligu šampiona, pošto ima pet bodova više od petoplasiranog Milana. Sa druge strane, Atalanti do kraja ostaju tek teoretske šanse da se na kraju sezone nađe u zoni plasmana u LŠ.
Rezultati: Milan – Lacio 2:0, Roma – Inter 0:2, Kremoneze – Specija 2:0, Atalanta – Juventus 0:2.
Danas: Torino – Monca, Napoli – Fiorentina, Leće – Verona.
Sjutra: Udineze – Sampdorija, Empoli – Salernitana, Sasuolo – Bolonja.
Tabela: Napoli 80, Juventus 66, Lacio 64, Inter 63, Milan 61, Atalanta 58, Roma 58, Fiorentina 46, Torino 45, Bolonja 45, Monca 45, Udineze 43, Sasuolo 43, Salernitana 35, Empoli 35, Leće 31, Specija 27, Verona 27, Kremoneze 24, Sampdorija 17.
