Proteklih su godina strani političari jako pazili da lokaciju za ljetni odmor odaberu u svojoj domovini jer odabir ljetovališta svakog političara nosi i političku poruku, kako o odnosima dviju država tako i onu usmjerenu vlastitim građanima. Često se to doživljava kao test predanosti radu, domoljublja i ekonomske odgovornosti, od toga koliko se novca potroši, do toga da, ako se troši, novac ostaje u domovini.
Dok prethodnih godina u susjednoj Sloveniji Hrvatsku ministri nijesu puno spominjali, iako mnogi političari ne samo da ljetuju već ovdje imaju i nekretnine, ove je godine gotovo cijela slovenačka vlada u Hrvatskoj, i to otvoreno govori.
Led je probio sam premijer Robert Golob, koji je još u junu objavio fotografije s kraćeg odmora na Brijunima, dodatno raščupane kose od soli i vjetra te neobrijan, napisavši kako “more čini čuda”, a uz fotografiju zalaska sunca dopisao “Čarobno”.
Za usporedbu, bivši premijer Janez Janša nikada nije, barem ne javno, napustio slovenačke planine tokom odmora.
Ministarka vanjskih poslova Tanja Fajon takođe će na Jadranu roniti i trčati. Da voli aktivan odmor, potvrdili su iz njenog ministarstva. I prije je ljetovala u Hrvatskoj pa i te kako iz prve ruke zna o gužvama na granicama. I njena stranačka koleginica, ministarka pravosuđa Dominika Švarc Pipan ljetovanje s porodicom provodi na hrvatskoj obali.
Bivši premijer, a sada ministar obrane Marjan Šarec već deset godina odlazi u isto mjesto u Istri, a odmor provodi uz knjigu.
Ministar ekonomije Matjaž Han tradicionalno ljetuje na Pagu, gdje ljetuje cijeli život. Sa suprugom ima manju obiteljsku kuću pa će, kako su poručili iz njegovog ministarstva, odmor provesti u društvu prijatelja i starih znanaca.
Ministar infrastrukture Bojan Kumer planira uzeti godišnji odmor samo za vikend i nedjelju dana u avgustu. I ministar za odnose sa Slovencima u susjednim zemljama i svijetu Matej Arčon najveći dio odmora provešće u Hrvatskoj, piše Večernji list.