''Druga smjena počinjala je u 14 sati, od ponedjeljka su ih prebacili u 12.30 jer je kasnije prehladno, a i sad kad idu u 12.30 u jaknama su, nekad pušte malo, ali uglavnom ne'' navodi ogorčeno jedan od roditelja.
Kako kaže, u razgovoru sa roditeljima iz drugih škola u Nikšiću, to nije usamljen slučaj. Početkom sedmice, kako tvrdi, problem sa grijanjem imale su još neke osnovne škole u tom gradu.
Drugi roditelj potvrdio je Dnevnim novinama da umjesto u 14 sati, druga smjena počinje u 12.30.
''Juče je dijete došlo sleđeno u jakni. Nemaju grijanje za puno radno vrijeme nego samo za pola. Radijatori su smanjeni na minimum. Poslije 15 ne griju i tako uštede svaki dan. To, kako sam čuo, nije slučaj samo u školi '',Ratko Žarić'', naveo je on.
Dnevne novine sinoć su poslale pitanja pomenutim školama, ali i Ministarstvu prosvjete, nauke, kulture i sporta.
