Kada je Hajduk dobio prvi meč u Splitu rezultatom 2:0, djelovalo je kako ih očekuje miran revanš u Kazahstanu. No, Tobol je u 67. minutu već imao prolaz dalje - pošto je sa dva pogotka Segrejeva i jednim Dušana Jovančića vodio sa 3:0. Nadu je Splićanima vratio Sahiti, pogotkom u četvrtom minutu sudijske nadoknade. Veliki šok uslijedio je u produžecima. U momentu kada su se očekivali penali, dva minuta uoči isteka drugog produžetka, Aškat Tagibergen donio je veliko slavlje domaćoj ekipi, koja je pobjedom 4:1 prošla u naredno kolo.
Ekipi Hajduka nešto slično dogodilo se i prije dvije godine u prvom kolu kvalifikacija za Ligu Evrope protiv malteške Gzire. Nakon što su na mediteranskom ostrvu slavili 2:0, Splićani su pred svojim navijačima poraženi rezultatom 3:1.
Podsjetimo, u drugom kolu kvalifikacija za Ligu konferencija nastupa i naša Sutjeska, čiji je revanš meč protiv Makabija iz Tel Aviva upravo počeo. Prvi duel, odigran u Podgorici, okončan je bez golova.