Italijanski mediji prenose da se Ustavni sud opredijelio za kompromisno rješenje time što nisu ni odbacili, ni odobrili sporni zakon.
Zakonom je predviđena "legitimna spriječenost" predsjednika i članova Vlade za pojavljivanje u sudskim procesima koji se vode protiv njih.
Zakon o "legitimnoj spriječenosti", usvojen u martu 2010. godine, dozvoljava predsjedniku Vlade i ministrima da ne izlaze pred sudove u periodu od najviše 18 mjeseci, odnosno do kraja septembra 2011. godine.
Kako prenosi italijanska agencija Ansa, pozivajući se na pouzdan izvor, Ustavni sud je odlučio da znatno smanji primjenljivost zakona, ali ga nije odbacio.
Prema odluci suda, tim zakonom se ne obustavljaju sudski postupci koji se vode protiv premijera ili članova Vlade.
Protiv Berluskonija se vode dva sudska postupka u Milanu - jedan zbog poreske utaje njegove medijske imperije Mediaset, a drugi zbog potkupljivanja svjedoka (slučaj Mils).
Prema današnjoj odluci Ustavnog suda, sudije u tim slučajevima sada mogu da procijene šta legitimno može da spriječi premijera, ili druge ministre, koje čeka suđenje.
U donošenju odluke sudije treba da odmjere sa jedne strane potrebu pravosuđa i sa druge strane potrebe zvaničnika koji obavljaju svoje dužnosti, navodi se u odluci Ustavnog suda.
Berluskoni je više puta odbacio sve optužbe i izjavio da ga proganja dio pravosuđa naklonjen ljevici.
Italijanski premijer juče je izjavio da stabilnost njegove vlade neće biti ugrožena kakva god bila odluka suda, i naveo da će "objasniti" italijanskoj javnosti koliko su "smiješni" sudski postupci koji se vode protiv njega.
