Kao i uvijek, sve je krenulo od kvalifikacija, u čijem je prvom kolu nastupilo gotovo 500 klubova, pri čemu je odigrano više od 200 utakmica. Naravno, u pitanju su ekipe iz najnižih rangova takmičenja – od osme do 10. lige.
No, FA kup uvijek obiluje kuriozitetima i interesantnim pričama, a tako je bilo i u uvodnoj rundi kvalifikacija. Naime, u njoj je nastupio klub koji je čitavih 138 godina čekao na debi u FA kupu.
Riječ je o Harlston taunu, devetoligašu iz istoimenog gradića iz Norfoka. Iako su osnovani 1885. godine, baš nikad im nije uspijevalo za rukom da stignu makar do kvalifikacija. Ali, to se ove godine promijenilo.
Međutim, nije Harlston imao debi za pamćenje. Oni su juče pred svojim navijačima poraženi od osmoligaške ekipe Kempston rovers, rezultatom 1:3. Domaćima nije pomoglo ni to što su čak dva igrača suparničkog sastava dobila crvene kartone.
Ipak, bio je to dan za pamćenje u gradiću pored Noriča, u kojem živi oko pet hiljada ljudi. Kuće i ulice su uoči utakmice bile ukrašene zastavama Harlston tauna, a njihov je stadion bio pun kao malo koji put u novijoj istoriji.
U kvalifikacijama slijedi još pet rundi, a na kraju će ‘preživjeti’ 32 niželigaša – njih će čekati zasluženo mjesto u prvoj rundi FA kupa.
