Poraz Bajerna u domaćem šampionatu uvijek je makar blago iznenađenje, no kada je u pitanju rival poput Augzburga, to je već senzacija, tim prije jer je pomenuti klub do večeras bio u zoni baraža.
Nakon uvodnog dijela utakmice, domaći su krenuli silovito, pa su u 23. minutu poveli preko Pedersena. Već u 36. minutu bilo je 2:0 za Augzburg, a strijelac je bio Han.
Svega dva minuta kasnije, Levandovski je smanjio na 2:1 i tada se već gostujućim navijačima činilo kako će u nastavku stvari doći na svoje mjesto.
No, to se baš i nije dogodilo. Uprkos konstantnim napadima, lider do kraja nije mogao ni do boda.
Vijest iz Augzburga najviše je obradovala fudbalere Dortmunda, koji bi, u slučaju da sjutra na Vestfalenu slave nad Štutgartom, prišli na svega bod zaostatka ekipi iz Minhena.
