U predstavi koju su pripremile i režirale naše poznate glumice Ivona Čović-Jaćimović i Žana Gardašević-Bulatović, po tekstu Pola Zindela i u adaptaciji Ane Ćetković, igraju dugogodišnji članovi škole glume Iva Aćimić, Vladana Vukotić, Dejan Bešović, Milo Nikolić, Andrej Šuškavčević, Ksenija Popović, Jelena Popović i Šejla Bakija.
Nakon premijere u junu u Podgorici, "Arlekin" je s ovom predstavom gostovao na festivalima Kotoru i Petrovcu namijenjenim najmlađoj publici.
Za ovu djecu, ali i za njihove predavače, bilo je to lijepo i emotivno iskustvo.
- Uvijek će mi u sjećanju ostati slika djece koja nas nasmijano dočekuju i slušaju svaku našu riječ sa velikom pažnjom. S radošću se prisjetim kako nas je dječak Veselin osmijehom prvi poželio dobrodošlicu i bodrio nas od samog početka predstave - kazala je mala Iva.
Andreju je ovo bio neponovljiv doživljaj sa životnom porukom.
- Zadovoljstvo je bilo nasmijati i upoznati ovu hrabru djecu koja imaju nadu da grade svoj život i slijede svoje snove.
Dejan kao vrline ističe skromnost i zahvalnost svojih novih drugara.
- Neko ima sve i opet nije srećan, a nekome pružiš samo malo ljubavi - i sreća krasi njihova lica. Mi smo uradili sitnicu, a djeci iz Bijele to je značilo mnogo.
Šejla je kazala da teško može da opiše to što srce osjeća.
- Uvijek ću pamtiti osmijehe te djece, naročito jednog Vasilija. Iskreno se nadam da su danas osjetili ljubav koju smo im svim srcem pokazali, a oni neka ostanu uvijek tako divni i nasmijani kakvi i jesu.
Za Mila je susret s mališanima iz Bijele bila velika pouka.
- Od danas još više cijenim to što imam porodicu koja me voli, podržava i uvijek je tu za mene.
S druge strane, kod Ksenije su pomiješana osjećanja.
- Tužna sam jer ne mogu da prihvatim da postoje roditelji koji mogu da ostave svoji djecu. Ali sam i srećna jer smo uspjeli da izmamimo toliko osmjeha i radosti našim drugarima.
Vladana je kod novih drugara primijetila istovremeno sjaj i tugu u očima.
- Pamtiću njihova nasmijana lica, ali i lica hrabrih i izdržljivih boraca. Nadam se da ćemo imati priliku da nekad ponovimo ovo druženje.
Ksenija se nada da će biti prilike da se ovakvo druženje uskoro ponovi, a Jelena dodaje kako je bila ponosna na što je drugare iz Bijele mogla da nasmije i razveseli i da joj je žao što sve njih ne može da povede sa sobom kući.
- Raduje me činjenica da se moj dugogodisnji san ostvario. Iz predivne saradnje i dubokog razumjevanja sa mojom koleginicom Žanom Gardašević-Bulatović, rodila se ideja da se ovaj i svi naši budući projekti prezentuju djeci koja to najviše i zaslužuju. Jer njihova radost i ljubav koju nam pruže kada smo s njima, najveća su nagrada za naš trud i rad - ističe jedna od inicijatorki cijelog projekta, Ivona Čović-Jaćimović.
Njena koleginica Žana Gardašević-Bulatović ponijela je sobom iz doma "Mladost" posebne utiske.
- Godinama unazad mislim na njih. Došao je valjda pravi dan za posjetu. Pravi dan... danas se pitam šta znači pravi dan... Za posjetu njima pravog dana nema; pravi dan je svaki koji će im unijeti malo promjene u svakodnevni životni ritam. Djetinjstvo, mladost, starost... Ima li životnog doba u kome nekome ne treba toplina doma, ljubav - istakla je ona nakon gostovanja u Bijeloj.
Ova predstava produkt je godišnjeg rada "Arlekina", a namijenjena je publici tinejdžerskog uzrasta.
Više detalja o upisu i novoj sezoni rada svi zainteresovani mogu naći na Fejsbuk (Facebook) stranici "Mali atelje Arlekin" ili pozivom na broj 067/911-78-54.
