Lagala bih kad bih rekla da nikad nisam nekog ko me je kritikovao nazvala ljubomornim.
Zaboga, bila sam i ja ilustrator sa 20 godina koji je mislio da je najpametniji (trenutno imam 28 i već sam svjesna koliko ću ja sa 38 godina da mi se smijem). Nisu ljudi kojima se ne dopada tvoj rad baš svi ljubomorni. Nekima se jednostavno ne dopada i to je skroz ok, jer nešto ne bi bilo u redu kada bi se nešto baš svima sviđalo, jer to nešto što se baš svima sviđa ni ne postoji. Trebao mi je minut to da razumijem i prihvatim, a usput sam uspjela da razumijem i ljude čije babe bolje crtaju od mene.
Ja sam svjesna koliko (ne)znam da crtam, pa sam zbog toga i svjesna koliko i nečija baba (ne)zna da crta. Ako je nešto tako lako uraditi - uradi ga. Ali stvarno. Ako je lako istrčati polumaraton- istrči ga. Ako je lako ošišati samog sebe- ošišaj se. Ako je lako završiti ekonomski fakultet- završi ga. Ako je baš tako lako nacrtati kornjaču u kupaćem kostimu- nacrtaj je. Samo nemojte da dajete svojoj babi te zadatke, možda ženu to ni ne zanima.
