Koliko god godina imalo tvoje dijete, sigurna sam da ti je sljedeća slika dobro poznata: sve vrijeme ovog svijeta provodi pred ekranom telefona, tableta, kompjutera ili laptopa, čini ti se da je preuzimanje aplikacija sa Google Play ili App Store-a naučio odmah nakon što je progovorio i prohodao, a internet konekcija mu je visoko na listi prioriteta. Kako znam? Zato što sam i sama roditelj jednog osnovca.

Dok mi je dijete bilo malo znala sam kako provodi vrijeme online: gledajući crtane na YouTube-u ili igrajući igre koje je preuzeo sa prethodno pomenutih platformi. Međutim, kako je postajao stariji, počelo je da me brine na šta troši minute po dobijenom odgovoru na pitanje: “Koja je šifra za Wi-Fi?”.

Stalno sam razmišljala o tome koji sadržaj konzumira ovim putem i kako će on uticati na moje dijete, s kim će stupiti u kontakt, da li će zbog vremena provedenog na internetu zapostaviti školske i sve ostale obaveze, da li će se svo druženje sa offline preseliti u online svijet, a na svaku novu priču koja dovodi u pitanje sigurnost na internetu ili novi slučaj nasilja putem interneta (cyberbullying) hvatala me blaga panika nakon koje uslijedi i meni i mom djetetu dobro poznata rečenica: “Ostavi više taj telefon”.

Da li su ovi strahovi zaista opravdani?

Potpuno sam sigurna u to da i ti, baš kao i ja, za svoje dijete želiš samo najbolje, te zbog toga nastojiš da ga zaštitiš od svih potencijalnih nevolja i negativnih uticaja, u koje spadaju i one koje može prouzrokovati boravak u online svijetu. Ipak, mislim da imam ohrabrujuće vijesti za tebe, mene i sve roditelje.

U rezultatima istraživanja koje smo sproveli prošle godine, ističe se zaključak kako 54% roditelja djece starosti do 13 godina kažu da je tehnologija na pozitivan način pomogla njihovoj djeci da se povežu sa svojim vršnjacima. Uz to, roditelji djece uzrasta od 11 do 13 godina naglašavaju kako je ovo najveći od svih benefita koje nam je tehnologija donijela.

Šta je sa školskim aktivnostima?

U slučaju da prethodno pomenutoj rečenici, kao i ja, ponekad dodaš nastavak poput: “Uzmi malo knjigu u ruke”, vrati se nekoliko godina unazad. Tačnije, u svoje školske dane kad ti internet nije bio dostupan. Sjeti se samo koliko si vremena i napora ponekad morao da uložiš kako bi došao do informacije koja ti je izuzetno važna za pisanje domaćeg zadatka. Ako željenih podataka nije bilo u jednoj knjizi, morao si da ih tražiš u drugoj, a sve to je iziskivalo beskonačno listanje stranica i stranica. Olakšavajuća okolnost bila je ta kad si u svojoj okolini imao nekoga ko ti može prenijeti specifično znanje, međutim i taj proces je iziskivao određeno vrijeme.

A sada se vrati u mart 2020. godine kada je svaka informacija na klik od tebe i kada postoji enciklopedija zvana Google koja nas sve ponekad podsjeti na omiljenu “1000 zašto, 1000 zato” knjigu.

Baš kao što mi ovdje provodimo vrijeme korisno, tako što pronalazimo inspiraciju za novo jelo kojim ćemo oduševiti ukućane, istražujemo utiske nekog proizvoda koji planiramo da kupimo od strane ljudi koji su ga već koristili, a čije mišljenje cijenimo ili tražimo ideju za “uradi sam” dekoraciju kojom ćemo oplemeniti životni prostor, tako i naša djeca uviđaju prednosti interneta u pronalaženju vrijednih resursa koji će im pomoći u sticanju novih znanja.

Da budemo precizni, podatak iz našeg istraživanja govori da čak 87% roditelja djece uzrasta do 13 godina smatra da je pristup internetu njihovoj djeci pomogao da poboljšaju uspjeha u školi, naglašavajući da je najveće poboljšanje primjećeno u čitanju, matematici i jezicima.

Koji sajtovi mogu pomoći tvom djetetu u učenju?

Za početak, tu je portal STEMedukacija gdje se mogu pronaći informacije o školama programiranja za osnovce i srednjoškolce, takmičenjima iz oblasti robotike, godišnjoj Olimpijadi znanja i mnoge druge aktivnosti, ali i resursi koji imaju za cilj da mladima pruže priliku za edukaciju i usavršavanje u oblastima nauke, tehnologije, inženjerstva i matematike.

Ako i tvoje dijete voli da uči na interesantan način, upravo ovdje će pronaći tekst o sajtovima koji mu mogu pomoći u učenju, bilo da je u pitanju matematika, programiranje ili učenje engleskog ili nekog drugog stranog jezika.

Kad usavrši engleski, predlažem da ga uputiš na riznicu znanja zvanu National Geographic Kids. Do tada, more korisnih informacija na našem jeziku, pored časopisa, može pronaći i na samom National Geographic veb sajtu, a još jedan online kutak za koji sam sigurna da će tvoje dijete oduševiti, naročito ako voli 3D animacije i sanja o tome da se jednog dana njima bavi, je Toontastic 3D, koji, osim što je dostupan za Android i iOS uređaje, besplatan je za preuzimanje i ne moraš brinuti o reklamama i kupovini tokom korištenja servisa, koji često umiju da pokvare ugođaj. Toga ovdje nema.

Za kraj, reci mi kako ti sada zvuči kada se u istoj rečenici nađu tvoje dijete i internet? Mnogo bolje, zar ne?

Ovaj članak dio je društveno odgovornog poslovanja kompanije doMEn koja godinama ulaže napore da Internet i nove tehnologije približi crnogorskom društvu, a posebno mladima. Od svog osnivanja, donira i direkto učestvuje u projektima koji podržavaju i unapređuju crnogorsko školstvo. Prošle godine kompanija je pokrenula portal www.stemedukacija.me namijenjen popularizaciji prirodnih nauka među mladima.